༄༅།། བོད་རྒྱལ་ལོ་ ༢༡༤༨ རབ་བྱུང་ ༡༧ པའི་རབ་གནས་ལྕགས་མོ་གླང་ལོའི་གནམ་ལོ་གསར་དུ་བཞད་པའི་རྟེན་འབྱུང་དགའ་སྟོན་ལ། རང་ཅག་རྣམས་ལ་བཀའ་དྲིན་བླ་ན་མ་མཆིས་པ་འཛམ་གླིང་ཞི་བདེའི་དེད་དཔོན་ཆེན་པོ་༸གོང་ས་ལྷ་མིའི་རྣམ་འདྲེན་ ༸སྐྱབས་མགོན་ ༸རྒྱལ་དབང་ཐམས་ཅད་མཁྱེན་པ་མཆོག་གིས་དབུས་རིས་སུ་མ་ཆད་པའི་བསྟན་འཛིན་གྱི་དབུ་ཁྲིད་སྐྱེས་ཆེན་རྣམས་དང་། བཀའ་དྲིན་མཚུངས་མེད་མཆོག་ཏུ་བཀུར་འོས། འདི་ཕྱི་གཉིས་ཀྱི་སྐྱབས་རྗེ་ཟམ་གདོང་མཆོག་སྤྲུལ་བློ་བཟང་བསྟན་འཛིན་དཔལ་བཟང་པོ་མཆོག་དང་། བཀུར་འོས་ཝཱ་ཎ་གཙུག་ལག་སློབ་ཁང་གི་རིགས་བདག་དགེ་བཤེས་ངག་དབང་བསམ་གཏན་ལགས་དང་། ཝཱ་ཎ་གཙུག་ལག་སློབ་ཁང་ནས་གསན་བསམ་མཐར་ཕྱིན་ཏེ་ཕྱོགས་གཏོགས་གང་སར་ཆོས་སྲིད་གཉིས་ཀར་མཛད་འཕྲིན་རྒྱས་དང་རྒྱས་བཞིན་པའི་སློབ་ཟུར་སེར་སྐྱ་ཕོ་མོ་རྣམས་དང་། ཝཱ་ཎ་སློབ་ཁང་འདིའི་དགེ་ལས་སློབ་གཉེར་བ་དང་། གཞིས་བྱེས་བོད་མི་དང་བོད་རིགས་རྣམས་དང་། བོད་ཀྱི་ལོ་གསར་ལ་མཉམ་ཞུགས་གནང་མཁན་ཡོངས་ལ་འཚམས་འདྲི་བཀྲ་ཤིས་བདེ་ལེགས་ཞུ། རང་ཅག་རྣམས་ལ་བཀའ་དྲིན་བླ་ན་མ་མཆིས་པ་སྤྱི་ནོར་ ༸གོང་ས་༸སྐྱབས་མགོན་༸རྒྱལ་བའི་དབང་པོ་མཆོག་སྐུ་ཚེ་མི་ཤིགས་རྡོ་རྗེ་བསྐལ་བརྒྱར་བརྟན་ཅིང་ཐུགས་ཀྱི་བཞེད་དགོངས་མཐའ་དག་འབད་མེད་ལྷུན་གྱིས་འགྲུབ་པ་དང་། གཙུག་ལག་སློབ་ཁང་འདིར་ཤིན་ཏུ་བཀའ་དྲིན་ཆེ་བའི་སྐྱབས་རྗེ་ཟམ་གདོང་རིན་པོ་ཆེ་རིན་པོ་ཆེ་མཆོག་སྐུ་ཁམས་བཟང་ཞིང་མཛད་འཕྲིན་མཁའ་མཉམ་ཡོངས་ལ་ཁྱབ་པ་དང་། འདི་གའི་སློབ་ཟུར་དང་། དགེ་ལས་སློབ་གཉེར་བ་རྣམས་ཀྱང་ཆོས་སྲིད་གཉིས་ཀའི་བྱ་བ་གང་དང་གང་ལ་ཞུགས་ཀྱང་གེགས་མེད་ཡིད་བསམ་ལྟར་གྲུབ་པ་དང་། སྐུ་ཁམས་བཟང་ཞིང་མཛད་འཕྲིན་ཕྱོགས་མཐར་རྒྱས་པ། དབྱར་མཚོ་ལྟར་གྱི་བློ་གྲོས་རྒྱས་ཞིང་ཐོས་བསམ་མཐར་ཕྱིན་ཏེ་གཏན་གྱི་མདུན་མ་ཐོབ་པ།  བཀྲ་ཤིས་ལོ་ལེགས།  ནད་མེད་ཚེ་རིང་། ཅི་བསམ་ལྷུན་འགྲུབ་ཡོང་བའི་སྨོན་འདུན། ཞུ། ཞུ།། 

​

ཝཱ་ཎ་གཙུག་ལག་སློབ་ཁང་གི་སློབ་ཟུར་རྒྱུན་ལས་ཐུན་མོང་་ནས།